كشفت الفنانة سماح أنور، عن عدم تخوفها من الموت في أي لحظة، مشيرة إنها تنتظره وبشدة منذ صغرها.

كشفت عن ذلك خلال استضافتها في برنامج «لحظات جريئة»، المذاع على قناة «القاهرة والناس» الفضائية، مساء اليوم.

تقول سماح أنور «الموت ده حبيبي مش بخاف منه، لكن أنا بخاف من الحياة».

وتردف الفنانة سماح أنور: «طول عمري نفسي أموت، لأن أنا عارفه اللي في الحياة لكن لما أموت هعرف اللي جاي، وفي نفس الوقت عاوزه اعرف إذا كان الناس لذيذة جدًا كده أمال اللي عملهم بقى عامل إزاي».

وتابعت الفنانة سماح أنور خلال حوارها مع برنامج لحظات جريئة: «أنا عاوزه أقعد مع ربنا لكن مش عاوزه أقعد مع اللي خلاص عرفته. الموضوع زي ما تكون في فيلم وقرب يخلص فعاوز تقوم بقى عشان تشوف هتروح فين تاني».

وكشفت الفنانة سماح أنور عن فضولها منذ صغرها في معرفة الغيب، موضحة: «عاوزه طول الوقت اعرف ما بعد حياتنا، لأن إحنا مصعبنها أوي على بعض، فحاجة خنقة. وأكيد الوضع بعيد عن الكوكب ده أكيد هيبقى أفضل».

يذكر أن برنامج «لحظات جريئة» يقدمه الإعلامي أحمد سالم.

ويذاع البرنامج على قناة «القاهرة والناس» الفضاية، الساعة05:40 مساءً، ويعاد الساعة 4:30 صباحًا، و11 صباحًا.

رأي الفنانة سماح أنور في الحجاب

وكانت الفنانة سماح أنور، قد أثارت جدلًا واسعًا مطلع الأسبوع الماضي بعد تصريحاتها حول رأيها في الحجاب، وذلك بعدما كشفت عن عدم اقتناعها بأنه فرض على المسلمات.

وقالت الفنانة سماح أنور حينها، خلال حوارها مع نفس البرنامج: «أغطي شعري ليه؟ الأئمة أجمعوا أنه فرض بس أنا بتكلم عن ربنا والقرآن، القرآن قال إيه»، مشيرة إلى أن تفسير آية الحجاب جاء من قبل البشر.

وأضافت: «ربنا خلق لي شعري، فهل شعري هو المشكلة ولا عورتي هي المشكلة، طب ما أنا بشوف محجبات كتير في الشارع لابسين استريتش»، متسائلة «هو ده يرضي ربنا؟».

وتابعت: «أنا ما بشتغلش في الدين عشان أتكلم فيه، أنا مليش فيه أنا بني آدم عادي، لو حطيت حاجة على دماغي بتخنق، ماليش علاقة بهو فرض ولا مش فرض أنا مش متخصصة في الدين». مضيفة «أنا بني آدم هتولد لوحدي وهموت لوحدي وهتحاسب لوحدي زي كل خلق ربنا وما تقوليش أعمل إيه أنت بلغتني المعلومة، متشكرين أوي مين اللي هيحاسبني ياعم وسيبني مع اللي خلقني».